ყოველწლიურად, შუშის ავეჯი უფრო და უფრო პოპულარული ხდება და უფრო მეტ ნდობას იძენს ინტერიერში ადგილის დამკვიდრებისთვის ბრძოლაში.
თავდაპირველად, ეს მხოლოდ ყავის მაგიდა და სააბაზანოს თაროები იყო, ახლა კი დაიწყეს შუშის სასადილო მაგიდების, სკამების, ბუხრების, ბარების, კომოდების, კარადა-კუპეების, კიბეებისა და საწოლების საფუძველის დამზადებაც კი.
ილუზიური სიმყიფე
შუშა დიდი ხანია აღარ არის სუსტი და ფაქიზი. ამ მასალის მტვრევადობის შესახებ მხოლოდ ლეგენდები დადის. უახლესი ტექნოლოგიების წყალობით, თანამედროვე შუშის პროდუქტები ძლიერ კონკურენციას უწევს ხის პროდუქტებსაც კი.
“ავეჯის წარმოებისთვის იყენებენ მაღალი გამძლეობის შუშის დაფებს, რომელთა სისქე მინიმუმ 8 მილიმეტრია და იგი ნებისმიერ დატვირთვას გაუძლებს”, – განმარტავს კაირათ კარაბაევი, Zodiac Rich Studio-ს დიზაინერი. ფაქიზად დახვეწილმა შუშის პროდუქტმა შესაძლოა თქვენს სახლში სიმშვიდე და ჰარმონია შემოიტანოს. თუმცა, მზად იყავით იმისთვის, რომ შუშის სისქის პროპორციულად, გაიზრდება პროდუქტის ფასიც.
შუშის პროდუქტის ღირებულებაზე ასევე შეიძლება იმოქმედოს შუშის დეკორატიული დამუშავების თვისებებმა. მწარმოებლები გვთავაზობენ როგორც ნაცნობ გამჭვირვალე შუშას, ისე ტონირებულს, ასევე დეკორითა და მინანქრით დამშვენებულს. მომხმარებლის უფრო მეტი უსაფრთხოებისთვის შუშის ყველა კიდე სპეციალური გზითაა დამუშავებული. ასე რომ, ასეთი ავეჯი სრულიად უსაფრთხოა იმ სახლშიც კი, სადაც მცირეწლოვანი ბავშვები ბინადრობენ.
შესაბამისობა სხვადასხვა ოთახებში
შუშის ავეჯმა პოპულარობა მოიპოვა ძირითადად, მისი ელეგანტურობის, სიმსუბუქისა და ორიგინალურობის გამო. მოგწონთ თუ არა, შუშის ავეჯი მართლაც ძალიან ლამაზია და იმსახურებს ნებისმიერ ოთახში არსებობას. თუმცა, დიზაინერები გვაფრთხილებენ, რომ იგი არ უხდება ყველა ტიპის საცხოვრებელ ოთახს.
ბავშვების ოთახი
მაგალითად, შუშის ავეჯის განთავსება არ არის რეკომენდებული ბავშვების ოთახში. მიუხედავად მწარმოებლების გარანტიისა მათი პროდუქტების უსაფრთხოების შესახებ, არ ღირს საკუთარი შვილების ჯანმრთელობის საფრთხეში ჩაგდება.
საძინებელი ოთახი
უფროსების საძინებლისთვის შუშის ავეჯი საკმაოდ შესაფერისია. შეგიძლიათ შეარჩიოთ შუშის კარადა-კუპე, ტუმბოები, მაგიდები, სკამები, თაროები და საწოლიც კი.
სამზარეულო
ყველაზე ხშირად, ისეთი მასალა, როგორიც შუშაა, გამოიყენება მისაღები ოთახისა და სამზარეულოს დეკორაციისთვის. ასე, მაგალითად, სამზარეულოში შეიძლება შეხვდეთ შუშის სასადილო მაგიდის ზედაპირს ან შუშის სკამებს.
მისაღები ოთახი
მისაღებ ოთახშიცაა შესაძლებელი შუშის ავეჯის განთავსება. იგივე სკამები, კომოდები, ღია თაროები და შუშისგან დამზადებული მაგიდები, ჭერზე კი ძალიან ორიგინალურად გამოიყურება იქნება იმავე მასალისგან დამზადებული ჭაღები. უახლესი მოდა გახლავთ შუშის მინი-ბუხარი. გამჭვირვალე მასალის წყალობით, ცეცხლის ანარეკლი მთელს სივრცეში ითამაშებს და შექმნის სითბოს უნიკალურ ატმოსფეროს.
კაბინეტი
სამუშაო კაბინეტში გამჭვირვალე ავეჯის გამოყენება საშუალებას მოგცემთ ამ ოთახში დრო კომფორტულად და სასიამოვნოდ გაატაროთ. შუშის ყუთებში შეგიძლიათ განათავსოთ სხვადასხვა სახის აქსესუარები, ასევე დადგათ შუშის სავარძელი და მაგიდა.
იდეალური არჩევანი პატარა ზომის ბინებისთვის
პატარა ზომის ბინების მფლობელებს დიზაინერები ურჩევენ აუცილებლად შეიძინონ შუშის ავეჯი ინტერიერის გაფორმებისთვის. მცირე ზომის ბინებში ასეთი ავეჯის გამოყენება სივრცეს ვიზუალურად გააფართოვებს. გარდა ამისა, შუშის ავეჯს ახასიათებს შუქის ამრეკლავი და გადამცემი თვისებები.
მაქსიმალური პლიუსები და მხოლოდ ერთი მინუსი
ექსპერტები ხაზს უსვამენ შუშისგან დამზადებული პროდუქტების უამრავ უპირატესობას:
ეკოლოგიურობა. ცნობილია, რომ შუშა დამზადებულია ბუნებრივი მასალისგან, რაც ნიშნავს, რომ იგი ეკოლოგიური მასალაა.
გამჭვირვალეობა. ამ თვისების და მზის ან ხელოვნური განათების არეკლვის წყალობით, შუშის ავეჯი ძალიან მსუბუქი და ნათელი ჩანს. ამავე დროს, სახლის საერთო ატმოსფერო მზის სინათლითა და ჰაერით ივსება.
სივრცის გაფართოების შესაძლებლობა. ეს თვისება პირდაპირ უკავშირდება წინა პუნქტს. შუშის ავეჯის არსებობამ შეიძლება ვიზუალურად გაზარდოს სივრცე. ამ ჯადოსნური თვისებით სივრცის საზღვრების გასაფართოებლად და სხივების გარდასატეხად ხშირად იყენებენ შუშას დიზაინერები.
გამძლეობა. როგორც ზემოთ უკვე აღვნიშნეთ, შუშის ავეჯის წარმოებისთვის გამოიყენება სპეციალური ტემპერირებული შუშა, რომლის სისქე მინიმუმ 8 მილიმეტრია და რომელსაც შეუძლია გაუძლოს 300 კგ-იან დატვირთვას.
მოდის მოთხოვნების დაცვა. მწარმოებლები და დიზაინერები დროს ფეხს უწყობენ და მუდმივად ქმნიან შუშის ახალ პროდუქტს. მომხმარებლებისთვის განსაკუთრებით პოპულარულია შუშის აქსესუარები და ავეჯის ელემენტები, რომლებიც ჰგავს გატეხილ შუშას ან გაბზარულ ყინულს.
მრავალფეროვანი ჩრდილები და ფორმები. ახლახან გამოჩნდა შუშის მრავალი სახეობა, რომლებიც ავეჯის წარმოებისთვისაა განკუთვნილი: შუშა შეიძლება იყოს გამჭვირვალე ან მქრქალი, გლუვი ან უხეში, ასევე არის ნიმუშებით ან სპეციალური ნახატებით გაფორმებული შუშა.
ინტერიერის სხვა სტილებთან შესაბამისობა. შუშის ავეჯი იდეალურად ერწყმის ინტერიერის ნებისმიერ სტილს. მსუბუქი შუშის ფორმებისა და თბილი ხის დეტალების, მაღალი ხარისხის ტყავის, რბილი ქსოვილებისგან დამზადებული ავეჯის კომბინაციამ შეიძლება გადაჭრას მრავალი ესთეტიური საკითხი.
ტენიანობის მიმართ წინააღმდეგობის გაწევის უნარი. შუშის ავეჯს არ ეშინია მაღალი ტენიანობის, მზის პირდაპირი სხივებისა და სხვა მავნე ფაქტორების. სწორედ ამიტომ არის იგი ხშირად დამონტაჟებული სამზარეულოსა და სააბაზანო ოთახში, და გამოიყენება ლოჯიას მოსაწყობად.
შუშის ავეჯის ერთადერთი მნიშვნელოვანი ნაკლი მისი ღირებულებაა. ხარისხიანი პროდუქციის წარმოებისთვის აუცილებელია დახვეწილი და მაღალტექნოლოგიური აღჭურვილობის გამოყენება. გარდა ამისა, შუშის ავეჯი, როგორც წესი, შეზღუდული რაოდენობით მზადდება, დიზაინერების ესკიზების მიხედვით. რაც ასევე გავლენას ახდენს პროდუქტის საბოლოო ფასზე.
