6 მარკეტინგული ხრიკი, რომელთა გამოყენებით კომპანიებმა მილიონობით დოლარი იშოვეს

მარკეტინგის ისტორია მოიცავს უამრავ ისეთ სარეკლამო კამპანიას, რომელიც ერთი შეხედვით მარტივი ჩანდა, თუმცა კომპანიას მილიონობით დოლარი მოუტანა. მარკეტერებს ხშირად აოცებთ კარგი სარეკლამო კამპანიების მიერ გამოწვეული წარმატებები, განსაკუთრებით ისეთი პროდუქტების შემთხვევაში, რომლის საჭიროების შესახებ ადამიანებმა აქამდე არც კი იცოდნენ. სწორედ ამიტომ წარმოგიდგენთ ისეთ სარეკლამო აქციებს, რომლებმაც ბრენდები მსოფლიოს სამუდამოდ დაამახსოვრეს და შეაყვარეს:

Jeep და მისი ფარების ფორმა

ჯიპმა ახალი მოდელის გაყიდვების გასაუმჯობესებლად მარკეტინგის გურუ კლოტეირ რეპაილე დაიქირავა. ექსპერტმა გადაწყვიტა კომპანიისთვის შეეთავაზებინა ძველი, ორიგინალი მოდელებისთვის დამახასიათებელი ფარების ფორმის გამოყენება. კლოტეირმა აღნიშნა, რომ ჯიპის ბრენდი თავისუფლებასთან, სისწრაფესთან და ცხენებთანაა დაკავშირებული ამერიკელი მყიდველებისთვის. სხვა სიტყვებით რომ ვთქვათ, მყიდველი ჯიპში ცოცხალ არსებას, ცხენს ხედავს. ოთხკუთხედმა ფარებმა ამ ასოციაციის დამსხვრევა გამოიწვია. კომპანიამ ამ რჩევის გათვალისწინებით კვლავ მრგვალი ფარების გამოყენება დაიწყო და ჯიპების გაყიდვებმა მაშინვე დაიწყო მატება.

ნესტლე და ყავის კულტურა

საიდუმლო არაა, რომ იაპონელებს ჩაი უფრო მეტად უყვართ, ვიდრე ყავა. სწორედ ამიტომ გადაწყვიტა ნესტლემ ამ ქვეყანაში ღრმა მარკეტინგული კვლევის ჩატარება. მისი ყავის გემო იაპონელებს მოსწონდათ, თუმცა ყავის სმა აქ ტრადიციად არ ითვლებოდა და არც მის გემოსთან არ აკავშირებდათ ბავშვობის მოგონებები იაპონელებს. ამის გამო გაყიდული ყავის რაოდენობა ძალიან დაბალი იყო ნესტლესთვის. ამის გამოსასწორებლად კომპანიამ იაპონიაში ყავის გემოს მქონე კამფეტების გაყიდვა დაიწყო. მათი დახმარებით იაპონელი ბავშვები ყავის გემოს მიეჩვივნენ და მასთან დაკავშირებული მოგონებებიც გაუჩნდათ. სწორედ ასე აქციეს ნესტლეს მარკეტერებმა ყავა ტრადიციულ სასმელად აღნიშნულ ქვეყანაში. ასე გამოზარდა კომპანიამ ყავის მსმელი კლიენტები იაპონიაში და ამის წყალობით მისი ყავის გაყიდვებიც მნიშვნელოვნად გაიზარდა. 2020 წლის სტატისტიკის მიხედვით თითოეული იაპონელი საშუალოდ წელიწადში 2 კილო ყავის მარცვლებს მოიხმარს.

Lay’s-ის ჩიფსები და ახალი შეფუთვა

ლეისის მარკეტერებმა შეფუთვის განახლება გადაწყვიტეს. კომპანიამ ჩიფსების პარკებზე მომღიმარი სახეები განათავსა, რისი დახმარებითაც ადამიანებს მარტივად შეეძლოთ სასაცილო ფოტოს გადაღება.

ამ მარკეტინგული ხრიკის შედეგებმა მოლოდინებს გადააჭარბა. სოციალური მედია გაივსო ლეისის ჩიფსის ფოტოებით. უამრავი ადამიანი წავიდა მაღაზიაში მათ საყიდლად მსგავსი ფოტოების გადასაღებად. სწორედ ასე მოიგო ბრენდმა ახალი მომხმარებლების გული.

პუმა, პელე და შეუკრავი თასმები

1970 წელს მექსიკუში გამართული მსოფლიო ჩემპიონატის მატჩის წინ, თამაშის დაწყებამდე პელე რამდენიმე წამით შეჩერდა და თასმების შესაკრავად დაიხარა. ამ საქციელის გამო ყველა კამერამ ფოკუსი სწორედ მასზე გადაიტანა და მთელმა მსოფლიომ დაინახა, რომ ცნობილ ფეხბურთელს სწორედ პუმას ფეხსაცმელები ეცვა. გავრცელებული ჭორების მიხედვით პელეს ამ ჭკვიანური მარკეტინგული ხრიკის სანაცვლოდ 25 ათასი დოლარი გადაუხადეს.

დომინოს პიცა და უხეში სიმართლე

2010 წელს დომინოს პიცამ სენსაციური სარეკლამო აქცია დაიწყო. რეკლამაში ნაჩვენებია მარკეტერების კვლევა, რომლებიც დომინოს პიცის შეფასებებს კითხულობენ და პასუხად აწყდებიან ისეთ ფრაზებს, როგორიცაა “ყველაზე ცუდი პიცა რაც კი მიჭამია”, “პიცის ცომი კარდონს გავს”, “სოუსს კეტჩუპის გემო აქვს” და ა.შ ვიდეოს ბოლოში კი დომინოს პიცას პრეზიდენტი გამოდის და ამბობს, რომ იგი გაბრაზებულია მიღებული შედეგებით და ამის გამო შეუსვენებლად იმუშავებს კომპანიის ხარისხის გამოსასწორებლად. ამის შემდეგ დომინოს პიცამ პიცის მომზადების რეცეპტი და ტექნოლოგია შეცვალა, ასევე გააუმჯობესა მიტანის სერვისიც. ამის წყალობით გაიზარდა კომპანიის აქციების ფასიც. თითოეული მათგანის ღირებულება 2010 წელს 9 დოლარს შეადგენდა, 2017 წელს სარეკლამო კამპანიის შემდეგ კი ერთი აქციის ფასმა 160 დოლარს მიაღწია.

ჰიგიენური საფენები და უცნობი სახელი

წინა საუკუნის საწყის პერიოდში ქალის მენსტრუაციულ პერიოდზე საუბარი მიუღებლად და არაკულტურულ საქციელად ითვლებოდა. ბევრს იმისიც კი სჯეროდა, რომ პერიოდის დროს ქალების ნდობა არ შეიძლებოდა, რადგან არავინ იცოდა რას ჩაიდენდა ქალი “პერიოდის” განმავლობაში. ასეთ დროს ქალებს გაკვეთილების გაცდენასაც კი აიძულებდნენ.

სწორედ ამიტომ მოუწიათ ჰიგიენური საფენების მწარმოებლებს იმაზე ბევრი ფიქრი, თუ როგორ გაეყიდათ ტაბუდადებული თემისთვის გამოსაყენებელი საფენები საზოგადოებაში. კომპანია კიმბერლი-კლარკი გენიალურ აღმოჩენამდე მივიდა. მათ დაიწყეს კოტექსის გაყიდვა. ამ საფენის შესახებ მხოლოდ სახელს არეკლამებდნენ და არავინ არ იცოდა რა იყო ის. მამაკაცებს წარმოდგენაც კი არ ჰქონდათ, თუ რა იყო კოტექსი. სწორედ ამის გამო ეს სიტყვა ჰიგიენური საფენების აღმნიშვნელ კოდურ სიტყვად იქცა. სწორედ ამიტომ მოიპოვა ახალმა პროდუქტმა სწრაფი და დიდი პოპულარობა. ლეგენდის მიხედვით ერთხელ დიდ ვახშამზე ახალგაზრდა ამერიკელმა კაცმა გაბრაზებით წამოიყვირა: “ნეტავ ვინმემ მითხრას რა არის კოტექსი!” თუმცა, ამ წამოყვირებაზე მას არავინ უპასუხა. კოტექსის მნიშვნელობას ქალები იდეალურად ინახავდნენ საიდუმლოდ.