ცნობილმა ბრიტანულმა არქიტექტურულმა კომპანიამ Heatherwick Studios შანხაიში სავაჭრო ცენტრის „1000 ხე“ ერთი ნაწილის მშენებლობა დაასრულა. ბრიტანელმა არქიტექტორებმა ტრადიციების უცვლელად დააპროექტეს შენობა, რომელსაც ეგზოტიკური მცენარეებით დაფარული მთის ფორმა აქვს და ფართო მდინარით გაყოფილია.
2019 წელს შანხაის გარეუბანში, M50 ხელოვნების რაიონისა და ქალაქის პარკის კვეთაზე, მრავალფუნქციური სავაჭრო ცენტრის 1000 trees („1000 ხე“) მშენებლობა დაიწყო. პროექტის ავტორი უჩვეულო ობიექტებით ცნობილი ბრიტანული არქიტექტურული კომპანიაა Heatherwick Studios, რომელსაც სამშენებლოდ რთული ნაკვეთი შეხვდა. ტერიტორია ორ ნაწილად იყო გაყოფილი, რადგან მდინარის სხვადასხვა ნაპირზე მდებარეობს. არქიტექტურული ანსამბლი რთულ ტოპოგრაფიაში ჰარმონიულად რომ მოერგოთ და ერთიანი ობიექტის ილუზია შეექმნათ, გადაწყვიტეს აეშენებინათ შენობა მთის ორი ნახევრის სახით, რომელიც ნაწილობრივ მცენარეებით იქნებოდა დაფარული.
Novate–ს ინფორმაციით, პროექტით გათვალისწინებულია უფრო მასშტაბური დასავლეთის შენობის და აღმოსავლეთ სანაპიროზე „მთის დაქანებული მხარის“ მშენებლობა. აღმოსავლეთ შენობა ექსპლუატაციაში შევიდა და უკვე შეგიძლიათ ნახოთ, რომ პროექტი წარმატებული და შთამბეჭდავია. 10 სართულიანი სავაჭრო ცენტრი დაშვებული კიდეებით რაიონის ისტორიულ უბანს და ქალაქის პარკის ბუნებას ჰარმონიულად ერწყმის. პროექტის თანახმად, ორივე შენობის აშენების შემდეგ „მთის“ ორივე ნახევრის გარე მხარეს 1000 ხე გამოჩნდება, რომ სავაჭრო ცენტრის სახელს შეესაბამებოდეს. არაფერს ვამბობთ 25 ათას ბუჩქზე, ყვავილსა და ბალახზე, რომელიც ობიექტის ეფექტური გარეგნობის მხარდასაჭერად შეირჩევა და წლის სეზონების მიხედვით შეიცვლება.
კონსტრუქციული თავისებურებები: ვერტიკალური გამწვანება ორგანიზებულია კასკადური სვეტებით, რომლებიც, როგორც წესი, შენობის შიგნით მდებარეობს და არა გარეთ. სვეტები კონსტრუქციული ელემენტების როლს ასრულებენ, რომლებიც შენობის სახურავზე „პარკის“ აწევას უზრუნველყოფს, იმის წყალობით, რომ მათზე ტევადი ქოთნებია, რომელშიც ხეებს გაზრდა შეუძლიათ.
მრავალდონიანი სვეტების ზედა ნაწილში შეგიძლიათ ნახოთ ფოთლოვანი, მარადმწვანე, ხილის და ყვავილის ხეები ბუჩქებთან და ამპელურ მცენარეებთან ერთად, რომლებიც ქოთნებს ლამაზად ეკიდებიან. ქვედა ტერასებსა და მდინარის მახლობლად დაბალი და აყვავებული ფლორა ჭარბობს. სხვადასხვა აყვავებული მცენარე მთის ბორცვის ილუზიას ქმნის, რომლის სილამაზე სეზონზეა დამოკიდებული.
პროექტის ავტორების და ლანდშაფტის დიზაინის შანხაურული კომპანიის თქმით, მხოლოდ ის მცენარეები შეირჩა, რომლებიც ამ მხარეში იზრდება და მიწის ამა თუ იმ დონეზე გაზრდა შეუძლიათ, დამატებითი პირობები არ სჭირდებათ. გარდა ამისა, აღსანიშნავია, რომ ბუნებრივ მრავალფეროვნებას შორის ქვედა სართულიდან დაწყებული ტყის ბილიკის მსგავსი გზა მიიკლაკნება, რომელიც სახურავმდე მიდის.
დაკიდული ბაღები მრავალფუნქციურ ცენტრს მხოლოდ მდინარის მხრიდან ამშვენებს, ხოლო სამხრეთ ფასადს ადგილობრივი და უცხოელი მხატვრების ქუჩის ხელოვნების კოლექცია ამშვენებს. გარდა ამისა, ახალი არქიტექტურული ობიექტი ორგანულად აერთიანებს პარკის ზონას და რამდენიმე ისტორიულ შენობას, რომელთაც კულტურული მემკვიდრეობის ძეგლის სტატუსი აქვთ, მათ შორისაა ძველი წისქვილის ნანგრევები და მიტოვებული ქარხნის კოშკი.
Novate–ს ინფორმაციით, პროექტის მეორე, უფრო მასშტაბურ ობიექტზე მუშაობა სრული ტემპით მიმდინარეობს. უცნობია, როდის დასრულდება მრავალფუნქციური სავაჭრო ცენტრის „1000 ხე“ დასავლეთ ნახევრის მშენებლობა.
