შეფმზარეულების 9 ხრიკი, რომელიც გამრავლების ცხრილივით უნდა დაიზეპიროთ

რატომ გვთავაზობენ რესტორნები ასეთ გემრიელ და ლამაზ კერძებს? რადგან მზარეულებმა იციან, როგორ წარმოაჩინონ მაქსიმალურად მომგებიანად თუნდაც მარტივი პროდუქტები. Novate რამდენიმე საიდუმლოს გიზიარებთ, რომელთაც პროფესიონალი მზარეულები კულინარიაში ხშირად იყენებენ. ამ რჩევებით შეიარაღდით და უახლოეს დროში გამოსცადეთ.

ხრიკი 1: წყლის ნაცვლად ბულიონი გამოიყენეთ

ეს წესი მხოლოდ წვნიანს არ ეხება, არამედ ხორცის სოუსებს და ბევრ სხვა კერძს. თუ თხევადი კონსისტენციის მიღება გსურთ, კერძი არა წყალში, არამედ ბოსტნეულის ბულიონში გააზავეთ. მას უფრო რთული გაჯერებული და მრავალმხრივი გემო აქვს, რის ხარჯზეც კერძი აბსოლუტურად სხვა და მოულოდნელი მხრიდან გაიხსნება.

ხრიკი 2: თითოეულ დესერტს მარილი დაუმატეთ

ვფიქრობთ, რომ მარილი კერძს უფრო მარილიანს ხდის და სხვა ამოცანას არ ასრულებს. სინამდვილეში, გემოს ძლიერი გამაძლიერებელია, რომელიც სხვა დანარჩენ რეცეპტორებს აღაგზნებს. დესერტში მწიკვი მარილის დამატებით საყვარელი პროდუქტების გემოს ახლებურად შეიგრძნობთ.

კიდევ რამდენიმე მიზეზი, რატომ არის მარილი აუცილებელი ტკბილ კერძებში:

  • ოსმოსურ წნევას ქმნის. გაიხსენეთ, რა ემართება კომბოსტოს, როცა მასში მარილს ყრით? სწორია, წვენი გამოდის. იგივე ხილის და კენკრის შემთხვევაშიც ხდება. თუ გსურთ, რომ დესერტში შიგთავსმა წვენი გამოიღოს, ცოტა მარილი აუცილებლად დაუმატეთ.
  • წებოვნებას აძლიერებს და ცომს უფრო მოქნილს ხდის. თუ მარილს ბისკვიტს დაუმატებთ, ცომი კარგად ამოვა და შიგნით სველი დარჩება, ასე დამატებითი გაჟღენთვა არ მოგიწევთ. თუ ხორბლის ფქვილით ცომეულს ამზადებთ, მარილის დამატება არ დაგავიწყდეთ.
  • კვერცხის ათქვეფას ამარტივებს და აჩქარებს. აქტუალურია, თუ სათქვეფს ან დაბალ სიჩქარეზე ჩართულ მიქსერს იყენებთ. მარილი ცილასთან რეაქციაში მაშინვე შედის, აქაფებას იწყებს და აფუებული ხდება.

ხრიკი 3: ხორცი „გაახავერდოვნეთ“

„გახავერდოვნება“ – ხორცის ნახევრად მზა პროდუქტის მომზადების ტექნოლოგია, რომელსაც ჩინურ რესტორნებში პროდუქტის წვნიანობის შესანარჩუნებლად, ასევე ნაზი და აბრეშუმისებრი ტექსტურის მისაცემად ხშირად იყენებენ. ხშირად ქათმის ფილეს „ახავერდოვნებენ“, მაგრამ სხვა სახეობის ხორცთან და თევზთან ექსპერიმენტები შეგიძლიათ ჩაატაროთ.

ტექნოლოგიის არსი მარტივია. სანამ ხორცს ტაფაზე მოათავსებთ, სოიოს სოუსის, კვერცხის ცილის, სახამებლის და ძმრის ნარევში დაამარინადეთ. კარგად აურიეთ, რომ თითოეული ხორცის ნაჭერი მარინადით დაიფაროს, შემდეგ ნახევარი საათით გააჩერეთ. ვადის გასვლის შემდეგ მცენარეულ ზეთწასმულ ტაფაზე შეწვით, თითოეული მხრიდან 2-3 წუთით, და გემრიელი კერძით ისიამოვნეთ.

კვერცხის ცილის და სახამებლის გარსი ქათამს გადახურების საშუალებას არ მისცემს და შიგნით წვნიანობას შეუნარჩუნებს. მზა კერძი ძალიან წვნიანი და ნაზი გამოვა.

ხრიკი 4: საწებელს მდოგვი დაუმატეთ

ზოგჯერ საწებელი ძალიან თხელი და წყლიანი გამოდის. ასეთის ჭამა თავად არ გვსურს, მით უფრო სტუმრებისთვის მირთმევა. საბედნიეროდ, მასის გასასქელებლად და საჭირო კონსისტენციის მისაღებად სწრაფი მეთოდი არსებობს. რამდენიმე ჩაის კოვზი მდოგვი ან მიწისთხილის კარაქი დაუმატეთ. მარტივი ინგრედიენტები საწებელს მთლიანად გარდაქმნის, სქელს და ნაჯერს გახდის, „პრიალა“ ბზინვარებას მიანიჭებს. თუ ცხარე საკვები არ გიყვართ, კლასიკური მდოგვის ნაცვლად დიჯონის გამოიყენეთ, ის უფრო ნაზი და დელიკატურია.

ყურადღება მიაქციეთ: თუ საწებელში გოროხებია, საჭირო კონსისტენციას ვერ მიიღებს და წყლიანი დარჩება. საცერში გაატარეთ, შემდეგ გაახურეთ და ნახეთ, გასქელდა თუ არა გოროხების დაშლის შემდეგ. სხვა მეთოდი: დააბლენდერეთ. ამ შემთხვევაში ჯერ საწებელი გააგრილეთ, შემდეგ ბლენდერის ჭიქაში ჩაასხით, წინააღმდეგ შემთხვევაში სახურავი შეიძლება გაიბეროს.

ხრიკი 5: კვერცხი პაშოტი ტაფაზე მოამზადეთ

კვერცხი პაშოტი –კვერცხი, რომელიც ნაჭუჭის გარეშე ცხელ წყალში იხარშება. ასე ცილა მყარი გამოდის, ხოლო გული რბილი და კრემიანია, ამიტომ გაჭრისას კვერცხიდან იღვრება. ბევრმა იცის ამ კერძის მომზადება ძმრით და ძაბრით, ასევე პარკით, მაგრამ უფრო მარტივი მეთოდიც არსებობს, რომელიც დამწყებ დიასახლისებს გამოადგება.

მოკლედ, აიღეთ ტაფა, ქურაზე გააცხელეთ, კარაქი წაუსვით და კვერცხი ფრთხილად გატეხეთ ისე, რომ გული არ დაზიანდეს. გულის გარშემო ცილის გამკვრივებას დაელოდეთ, შემდეგ ცოტა წყალი დაასხით და თავსახური დაახურეთ. რამდენიმე წუთში გულის გარშემო ცილა შეიკვრება და გარსს შექმნის, თან გული თხევადი დარჩება ისე, როგორც კლასიკურ პაშოტში.

ხრიკი 6: კვერცხი საფანელით ჩაანაცვლეთ

როგორც წესი, კვერცხი ინგრედიენტების შემკვრელია და მათ დაშლის საშუალებას არ აძლევს. სწორედ ამიტომ, კატლეტის ფარშში კვერცხის დამატება მიღებულია. ამ გადაწყვეტილებას არსებითი გამონაკლისი აქვს – ცილა ხორცს სინაზეს და წვნიანობას ართმევს, რის გამოც მზა კატლეტი მშრალი გამოდის.

თუ ამ პრობლემას ხშირად აწყდებით, ჩვეული კვერცხი საფანელით ჩაანაცვლეთ. ბევრი შეფმზარეული ასე იქცევა. მათი თქმით, საფანელით კატლეტი უფრო ნაზი გამოდის.

ხრიკი 7: ხორცი გემრიელი ქერქით მოამზადეთ

ხორცის შეწვა გარკვეულ ცოდნას და უნარს მოითხოვს, თუმცა ამ პრობლემას თითქმის ყოველდღე ვაწყდებით. დაიმახსოვრეთ 3 ოქროს წესი: ჯერ ქაღალდით ზედმეტი სითხე მოაშორეთ, შემდეგ მარილი და წიწაკა დაუმატეთ, ამის შემდეგ ცხელ ტაფაზე მოათავსეთ. ჭურჭელი ბოლომდე არ გაავსოთ, რადგან ასე ხორცი კი არ შეიწვება, არამედ ჩაშუშდება. ხორცის ნაჭრები პორციებად შეწვით, ერთმანეთს დააშორეთ.

თუ ხორცს აცხობთ, სპეციალური წასასმელი მოამზადეთ. რამდენიმე ვარიანტი არსებობს. ღორის ხორცისთვის გამდნარი კარაქის და თაფლის (1:1) ნარევი შესაფერისია. ფრინველის ხორცს წინასწარ მცენარეული ზეთის, ფორთოხლის წვენის, სოიოს სოუსის და თაფლის ნარევი წაუსვით. ასე საოცარ ოქროსფერ ქერქს მიიღებთ.

ხრიკი 8: შოკოლადი კარაქთან ერთად გაადნეთ

ბევრი დესერტის რეცეპტში გამდნარი შოკოლადი შედის. ჩვეულებრივ, მზარეული შოკოლადს ქურაზე ან ორთქლის აბანოზე სასურველ კონსისტენციას აძლევს, მაგრამ რომელი მეთოდიც არ უნდა გამოიყენოთ, შოკოლადის „დიდხანს“ გაჩერების რისკი არსებობს. ამის თავიდან ასაცილებლად გამოიყენეთ შემდეგი ხრიკი: კარაქი წყლის ორთქლზე ან მიკროტალღურ ღუმელში გაადნეთ, შემდეგ შოკოლადის დატეხილ ფილას მოასხით. აურიეთ, სანამ შოკოლადი არ გათხელდება.

ხრიკი 9. სპაგეტის სოუსს ყავა დაუმატეთ

თუ დღემდე მაკარონს კარაქს უმატებთ, დროა ექსპერიმენტები ჩაატაროთ და გემრიელი სოუსი მოამზადოთ, რომელიც პასტის გემოს გამოააშკარავებს. პომიდვრის ჩვეული სოუსი მოამზადეთ, შემდეგ ცოტა ყავა დაუმატეთ. ორი ვარიანტია, როგორ გააკეთოთ. გრანულები ქათმის ან ძროხის ხორცის ბულიონში გახსენით და შემდეგ სოუსს აურიეთ ან ახალი ყავა მოადუღეთ და დამატებით ინგრედიენტად გამოიყენეთ, თუ ხსნადი ყავის გემო არ მოგწონთ.

ყავა სპაგეტს და პომიდვრის სოუსს იდეალურად ეთავსება, რადგან პომიდორს ზედმეტ სიმჟავეს აშორებს და კერძს საოცარ არომატს და ორიგინალურ გემოს ანიჭებს.