სანამ ვაშლის ხეს ბაღში დარგავთ, სხვა ხეხილის–კენკრის კულტურებთან და დეკორატიულ მცენარეებთან მისი თავსებადობა უნდა შეაფასოთ. ე.წ. ბაღის „მაცხოვრებლები“ გარეგნულად უვნებელი შეიძლება ჩანდეს, მაგრამ გარკვეული გარემოების გამო შეიძლება ვაშლის ხესთან კომფორტულად ვერ იცხოვროს. ამას რამდენიმე მიზეზი შეიძლება ჰქონდეს: საერთო დაავადებები და მავნებლები, ინდივიდუალური მახასიათებლები. Novate გთავაზობთ მცენარეების სიას, რომლებიც ვაშლის ხესთან ახლოს არ უნდა დარგოთ.
ატამი
ვაშლი და ატამი ერთ ნაკვეთზე კომფორტულად ვერ იზრდება. ატამი ძალიან აქტიურად იზრდება, მიწიდან ბევრ სასარგებლო ნივთიერებას მოიხმარს. ხეს განვითარებული ფესვების სისტემა აქვს, რაც ვაშლის ხის დათრგუნვას იწვევს.
გარგარი
გარგარის ფესვების სისტემა ზრდის პროცესში გამოყოფს ტოქსიკურ ნივთიერებას, რომელიც ახლომახლოს მზარდ მცენარეებს წამლავს. გარდა ამისა, გარგარს და ვაშლის ხეს საერთო დაავადებები და მავნებლები აქვს.
ცირცელი
გასული საუკუნის დასაწყისში ამერიკაში ცნობილი გახდა, რომ ცირცელი ვაშლის ხის ცუდი „მეზობელია“. იქ ადგილობრივმა ფერმერმა შენიშნა, რომ ვაშლის ხეები დაბალი ხარისხის, მატლიანი ვაშლის მოსავალს იძლევა. ყოველწლიურად უხარისხო პროდუქციის რაოდენობა უმოწყალოდ იზრდება. აღმოჩნდა, რომ ვაშლის ხეს ცირცელის ჩრჩილის მუხლუხები თავს ესხმის.
ალუბალი
ალუბალი, როგორც ატამი, ვაშლის ხეზე ნეგატიურად მოქმედებს. ვაშლის ხის დათრგუნვის მიზეზები იგივეა. ალუბალი მსხვილი ფესვური ყლორტებით იზრდება და „მეზობლებს“ ზრდაში ხელს უშლის.
ბალი
ბალიც ვაშლის ხესთან ვერ მეგობრობს. ბალის განვითარებული ფესვების სისტემა „მეზობლის“ ფესვებს მიწის ზედა ფენიდან ქვედა ფენაში აგდებს, სადაც საკვები ნივთიერებები, ტენიანობა ცოტაა და ვაშლის ხე ჭკნება.
კოწახური
კოწახური, ძალიან დეკორატიული მცენარე, სახიფათოა არა მხოლოდ ეკლებით, არამედ ბერბერინით – ქიმიური ნივთიერება, რომელიც მიწაში ხვდება და ბევრი მზარდი მცენარის ფესვების სისტემას თრგუნავს.
ძახველი
ძახველის მთავარი თვისება, რომელიც ვაშლის ხესთან უსაფრთხო თანაარსებობას ხელს უშლის, მიწიდან ბევრი ტენის შეწოვაა. ასე მეზობელი მცენარეები უწყლოდ რჩება. გარდა ამისა, ძახველზე სახლდება ბევრი ბუგრი, რომლებიც შემდეგ ვაშლის ხეზე გადადიან.
იასამანი
იასამანი ლამაზი, უჩვეულო და სასიამოვნო სურნელის მცენარეა, რომელზეც ყველა შესაძლო მავნებელი სახლდება და დაავადებები ჩნდება. ვაშლის ხისთვის სახიფათო მეზობელია.
ჟასმინი
ითვლება, რომ ჟასმინი სხვა მცენარეების ზრდას ხელს უშლის. ვაშლის ხე ჟასმინისგან შორს დარგეთ. სხვა შემთხვევაში კარგ მოსავალს ვერ მიიღებთ.
სოჭი
მზარდი ნაძვის დამახასიათებელი თვისება ნიადაგში მჟავიანობის გაზრდაა. მცენარე მიწაში გამოყოფს ბევრ ფისს, რომლებიც მიწას აბინძურებენ. გამოცდილი მებაღეები გირჩევენ, რომ 3 წელი მოიცადოთ და წიწვოვანის ნაცვლად სხვა მცენარე მხოლოდ ამის შემდეგ დარგოთ.
ყოველთვის არ გვაქვს შესაძლებლობა, რომ ნაკვეთზე ყველა სასურველი ხეხილი და ბუჩქი სწორი გარემოცვის გათვალისწინებით დავრგოთ. თუ ვაშლის უხვი მოსავლის მიღება გსურთ, პრიორიტეტები დასახეთ და სასურველ მცენარეებს შორის არჩევანი გააკეთეთ. დიდი ალბათობით, ზოგიერთ კულტურაზე უარის თქმა მოგიწევთ ან კარგად დაფიქრდით, რომელ კუთხეში რომელ მცენარეს დარგავთ.
